lakar matemu makurenan ngajak Lale Dumilah mawanan tiang bani mamuuk mararik."
"Kenten taler tiang Ibu, Aji lan Bapa sampunang sumangsaya. Tiang ten ja lakar nyengahin Bapa ane sampun tuyuh majati tur ngaba surat tiange. Tiang mula mabela pati lakar ngetohin tresna. Tiang percaya yen Gusti Allah mula nitipang tiang lekad uii ragan inaq tiange, nanging saking takdir Gusti Allah masih matemuang tiang teken Tu Ngurah dadi jodoh tiange. Salawase tiang ten ja lakar engsap lan pegat marerama yapin ke raganne mangkin gedeg teken tiang," kenten pasautne Lale Dumilah nyantep pesan. Makejang ane ada derika dadi milu bungah. Luh Purnama lan Made Sinar enggal ngaturin tamiune ngawedang. klian banjare makenyem saha negehang jempolne angayu bagia "Dumadak Hyang Parama Kawi ngicen kasukertan salawase".
"Nggih yen wantah kenten puput amuniki dumun. Tiang sareng sami mapamit apang ten ngulgul Tu Ngurah sareng Lale Dumilah magadangin suung, ha ha ha ...."
Makejang mangkin ngawedang tan mari ngulgul ngantene. Suud ngopi rombongan pejatine bangun makire budal nanging andeganga teken Wayan Rempuh.
"Beh, Gede pada makejang negak ja malu, dini madaar. Suba kadung masoda."
"Sampunang Mek, benjangan tiang nunas. Tiang lakar mandus malu ka Ancar. Bapa, Pan Kobar, Gusti Aji, Gusti Biang tiang mapamit dumun. Tu Ngurah lan Jro Mekel elingang sampunang lintanganga wengi dewasa pangambilane mangkin," kenten atur kliane lantas pesu masemu guyu. Truna-trunine mabriag kedek. Ngantene masih milu kenyem saling sledetin masemu kabilbil. Wayan Rempuh lantas nunden panakne ngaba sodaane ka bale daja apang makejang pada ngajengang.
