teken Lale Dumilah. Nika awanan raganne mutusang yen panakne mula tresna tur lakar nutug agamanne Gusti Ngurah, melahan serahang apang pragat sapisan di Cakra, ten perlu buin lanturan upacara di Sengkol sawireh siman adate pada malenan. Buin mani Lalu Wiradana ajak pamanne katehang teken kepala kampunge kautus ka Cakranegara gumanti netes nakonin Lale Dumilah indik pajalanne nganten. Raden Nuna, misanne masih nagih milu ka Cakranegara.
Di Banjar Jeruk manis Cakranegara sapetekanne Lale Dumilah, Luh Purnama lan Wayan Galang uli Sengkol lantas di pamesune kapapag baan segehan, api takep lan tetabuhan muah canang genten. Gusti Biang Suci nandan mantu lan okane ka bale daja mengkeb. Sampune macelep ka kamar lantas kagebag disisi olih ibu, aji lan truna-truna banjare timpalne Yan Galang. Jam kutus utusane ane majati teka uli sengkol ngabarang indik pajatine sampun katerima. Nanging kari mawangked buin mani ada utusan ane lakar netes nakonin Lale Dumilah indik pajalane nganten, napi jakti madasar tresna ane sujati. Gusti Ngurah lan Lale Dumilah masih milu mirengang lapuran utusane. Yadiapin sedih raganne tetep nyantep wireh ada belinne lakar maang reramanne tatimbang jumah.
"Nah, jani cening ajak dadua suba pada mireng kenken panampen kulawargan Dendane nepasin indik pajalan ceninge mararik. Rahayu utawi rungka pajalan ceninge salanturne tuah ada di pamatut rembugan reraman ceninge. Sajawaning ento gumantine masih ada di muncuk lidah Dendane ane lakar nampenin patakon mamiq utawi utusane buin mani ane nrugtug pajalan ceninge. Yen pelih baan cening masaut, tan pariwangde patemun ceninge bisa bubar," kenten ajinne matuinget oka lan mantune sada aris.
"Inggih Ibu, Aji lan Bapa ajak makejang, tiang mula pada tresna
59
