tusing nuuh sawireh tusing nyak nutug kalacuran tiange. Ento awananne tiang luas ngumbara desa sateked-tekede matindakan. Ane suba liwat depang anggon pengalaman, anggon suluh di jalan. Eda mara kapegatan tresnane walesang dadi dengki. Tresnane ane tulus suci sinah tan sida baan ngengsapin. Ento awananne catetan, temon-temon lan potretan ane taen tresnain tiang enu masimpen rapi kayang jani. Denda perlu nawang sawireh tusing ada buin rahasia tresnasih ane patut engkebang tiang teken Denda. Cirin anak pinter kabisane ane bakat di sekolahan sinah patut ingetang kayang kawekas. Nanging tresnane ane matemuang iraga nganti makurenan patut belanin kayang mati. Apa buin cara Denda ngajak tiang jani suba dadi aperahu, jalan layarin tuut yeh tukade yadiapin mabias, mabatu-batu, nganti teked ka telenging samudrane tanpatepi, ane dadi uleng tatujon saluiring tukade ane ada di gumine," kenten Gusti Ngurah Darsana saha meluk lan ngecup rabinne mawanti-wanti. Lale Dumilah liang kenehne mireng pitutur rabinne buka keto. Ilang jejeh lan rimrim bayunne, lantas ngawalesang ngaras lan meluk rabinne. Srieng-srieng bulun kalongne mara tanganne Gusti Ngurah alon-alon ngeregang resluiting rokne lan maekang dastere. Lale Dumilah makenyem mukak bajunne lan ngentungang dasterne jooooh kateben.
Gusti Ngurah tau ing sasmita lantas ngamatiang lampu kamare tur ngidupang lampu neone di mejane. Endihanne ening gading. Saking asih tan mari ngredana Hyang Smara Ratih. Gusti Ngurah ngalem, ngurut-urut rabinne kang kinasih nganti tan sida naanang gulungan ombake nyujuh pasisi. Petenge nika karasa tan patanggu. Yen pangkuda kaden sang kalih ngipi bulane ulung di pabinan, tau-tau kedis carukcuke nguci di jendelane. Gusti Ngurah ngendusin malunan. Cingakina rabinne nyepepeh aris pesan sirepne. Alon raganne ngeladang tanganne ane
63
