tongos Dendane kost."
"Seken ne Bliq? Apang melah baan nyediaang dademenan beline. Silak Inaq, Miq, tiang luas malu apang ten bas peteng." Lale Dumilah ngundebang pintun montore. Padelengdeng masih yeh paningalanne. Wayan Galang ngidupang montore, makejang menekang lima ngawe-awe ma daag-daag. Magerung gasir pajalan montore ngauhang ngaliwatin desa Tanakawu, Panujak, Batujai, lan teked di Praya mara jam empat sanja. Dapetanga montore ane ngaba pajatine mara pesan mareren diarepan umahne Luh Purnama. Lale Dumilah tuara buin tuun uli montore. Luh Purnama lan Wayan Galang tuun morahan teken reramanne yen ane mara teka nika tuah utusan ane lakar mapajati ka Sengkol nyatiang Lale Dumilah ane kaantenang teken Gusti Ngurah Darsana. Sambil ngantiang sanja lakar majalan majati Luh Purnama nunden meme lan bapanne maang kopi lan nganemin tamiune gumentos ia ngajak Lale Dumilah teked di Cakranegara.
"Nggih Bapa sareng sami deriki dumun masandekan ngantos jam lima. Tiang mangkin majalan ka Cakra ngajak Lale Dumilah."Luh Purnama lantas pesu tutuga teken bapanne lan pak kliang nganti ka montore matemu ngajak Lale Dumilah. Wayan Galang ngidupang montorne lantas maseret banter pajalane mulih ka Cakranegara.
Jam lima rombongan pajatine mara majalan ka Sengkol ngojog kepala desane. Bapa Kepala Desa lantas ngajak kepala kampunge ngatehang pejatine kumahne Mamiq Wiradana saha nekedang indik sapangerauhan utusane gumanti pacang nyatiang Lale Dumilah karangkatang antuk Gusti Ngurah Darsana ane malinggih di Cakranegara. Kaplegan bengong mamiq lan inaq Wira mireng tutur Kepala Kampunge nganti tuara nyidayang ngaraos, napi buin nunden utusane negak. Makelo raganne naneng. Utusane masih milu majujuk
