"Araah sing perlu jaja asal Denda nyak bareng negak dini. Kali kenken mulih? Yen Milah ngorahang mulih sing barengin Bliq," kenten misanne matadah juari ngulgul.
"Tiang nak mulih ajebos, kadung bareng timpal ane nyemak madu di Kuta. Buin jebos lakar buin malipetan." Lale Dumilah age ka paon, ngopi ngajak inaqne saha ngorta kangin kauh anggon nyalimurang bayunne ane runtag, bingung, lan sedih. Ada ajam makelone Wayan Galang lan Luh Purnama saget teka mapagin, ngarerenang montorne di samping pamesune. Lale Dumilah lan inaqne pesu nyagjagin.
"Selamet sore Inaq, Mamiq. Sapunapi kenak sareng sami?" kenten Yan Galang.
"Ooh, nggih Yan. Tiang pada selamet makejang. Negak ja malu, gaenanga kopi apang sing kiap di jalan." Inaq Wiradana nandan Luh Purnama apang barengan negak.
'Beh, tiang sampun ngopi di timpal tiange di Kuta. Niki sampun nandes jam empat, tiang jaga mapamit apang ten petengan teked jumah gumentos singgah di Praya. Yen Denda Milah kenken, sampun bakat pesenane?" Kenten Luh Purnama makenyem.
"Ane pesenang tiang tonden pragat, nanging baanga sasepelanne ane suba lawas. Kanggoang barang antik," kenten Lale Dumilah saha ngajak timpalne negak di brugage. Lale Dumilah lantas nyemak bungkusane tur mapamit taken mamiq, inaq lan misanne. Kenten masih Luh Purnama, Wayan Galang pada masalaman nunas mapamit. Kecud masih sebengne Lale Dumilah mara nyalamin lan meluk inaqne. Abot rasa batisne lakar menek ka montore, tolah tolih, dando-dando macanegan. Misanne egar nyapatin.
"Milah, kayang malam Minggune Beliq lakar ka Cakra bareng inaq lan mamiq. Kone apang maan nginep. Beli masih meled apang nawang
55
