barang antik," kenten raos inaqne.
"Aji roras tali Inaq, patuh buka argan pesenan tiange ane dereng pragat. Dadine niki malu anggona pasilihne. Ah, kanggoang dogen." Lale Dumilah ngelut inaqne. Tawanga panakne teka, Mamiq Wiradana pesu uli kamarne. Ia mara pesan suud madaar.
"Kenken Denda Milah, nyen kajak mulih?
"Ajak Luh Purnama Miq. Ia kari ka Kuta ngalih madu. Tiang masih mulih lakar meli kain kanggon Gek Sri di Denpasar, mungpung ada Gusti Ngurah lakar ke Bali."
"Buin pidan raganne payu majalan?" Kenten mamiqne nyesedang matakon.
"Kayang Minggune Miq, raganne singgah malu di Bali aminggu, mara menek kapal terbang ke Kupang terus ke Atambua." Lale Dumilah sredah sebengne ngorta ajak inaq lan mamiqne indik kuliahne lan torise di Mataram ane sayan rame tekanne.
Saget macelengus misanne teka bareng negak ngorta. Ia ngorahang mara pesan mulih uli Cakra lakar ngidih sangu anggon bekel praktek lapangan di pedesaan. Inaqne ka paon lakar nyemakang kopi, nanging tutuga teken Lale Dumilah. la merasa tuara demen mapaekan ngajak misanne. Kari mamiqne ane ajaka ngorta matadah lenggut makisi-kisi. Sampune kopine cumawis, Inaq Wira nunden Lale Dumilah ane ngabaang.
"Milah, aba malu kopine ka bale dangin. Mamiq mula disne ngopi kali Jani," kenten inaqne saha mesuang Jaja. Lale Dumilah manut ngaba kopine ka bale dangin.
"Silak Bliq Nuna, kopine tabah ten masedak ane jaen cara jumah beline."
