teka ngajak Lale Dumilah mara Gede ka Sengkol mapajati saha ngaba surat ane katur ring reramanne di Sengkol.
Nanging apang bisa ngareringa ngantene suba teked jumah." Pan Kobar negesang tan mari masih ngorahang lakar ngajak polisi kenalanne ane silihina mobil lakar nyupirin.
Tengaine ento Wayan Galang lan Luh Purnama tragia ngamaluin mulih uli kantor sawatara jam roras ngorahang ada kaperluan jumahne. Sujatinne ia lakar ngatehang Lale Dumilah mulih ka Sengkol apang maciri majalan nganten uli jumahne. Di jalan Luh Purnama lan Yan Galang busan-busan ngulgul Lale Dumilah apang ten sungsut. Napi buin nyanan lakar ngalahin umahne apang tetep egar, apang ten tawanga teken Inaq lan mamiqne lakar majalan nganten. Mula sukil ngalih ane madan rahayu, nanging niki madan gagodan muktiang tresnane ane sujati. Teked di Praya Luh Purnama mareren, singgah jumahne ajebos. Ia ngorahang lakar ka Kuta ngidih madu sig timpalne. Teken memenne ia mabesen yen ada timpalne uli Cakra teka, apang antianga malu jumah.
Teked di Sengkol Lale Dumilah tuun jumahne Luh Purnama
nerusang pajalanne ka Kuta ajaka Wayan Galang. Inaq Wiradana sedeng melaha mara mulih uli tegale.
"He, Denda Milah ko mulih. Nguda timpale tusing ajak singgah?"
"Buin ajebos Inaq. Ia kari ka Kuta ngalih madu ajak kelambi lambung jumah timpalne. Tiang masih bareng mulih lakar nyemak pesenan kamben sakordi sig Inaq Dangkane, anggon Gek Sri di Denpasar. Lakar titipang teken Gusti Ngurah," kenten Lale Dumilah lantas maklieng pesu kumahne Inaq Dangka. Ajebos ia sampun teka ngaba kain sakordi lantas edenganga teken Inaqne.
"Beh, ene kamben suba lawas pesan Denda. Aji kuda baanga meli. Yen tununan jani sing ada sutra buka kene. Ene dadi orahang suba
53
