ngajuang pedidi teken tiang. Di sampune nganten mara lantas gaenang Surat Keterangan Nikah lan Surat Keterangan Perubahan Susunan Keluarga apang teked derika tusing buin repot. Kenten masih serahang tugas-tugase teken tiang apang elahan tiang maang tugase teken ane ngentinin, sawireh ia mara teked deriki buin dasa lemeng." Kepala nuturin Gusti Ngurah saking aris. Sampune raganne pesu, Kepala Tata Usaha lan Sekretarise kaukina teken Kepala cabange. Raganne tugasanga ngae perpisahan lan mragatang surat-surat kapindahanne Gusti Ngurah. Pesu uli pimpinanne maka dadua nyalamin Gusti Ngurah Darsana. Timpalne lenan milu pati tekon. Mara tawanga raganne lakar pindah makejang teka nyalamin, nanging masih marasa kangen, sadih sawireh kalahina teken calon pimpinan ane saja trampil.
Di dina Budana makejang surat-surate sampun pragat lantas abana teken Gusti Ngurah ka Kepala Cabang sambilanga nunas mapamit lakar nganten.
"Pak, niki rincian tugas lan pakaryan tiange sane serahang tiang lan surat-surat kaperluan pindahe sampun puput. Tiang mapamit sorene mangkin jaga mapagin calon tiange. Nunas rastu Bapak mangda tiang tan manggihin pakobet."
"Nggih Dik Ngurah, dumadak apang selamet, rahayu. Yen marasa ada pakewuh orahang teken tiang. Selamet Dik," kenten Pak Kepala nyalamin raganne. Gusti Ngurah mapamit pesu lantas budal atahanga teken Nangah Sunia.
Di umahne Pan Kobar masih ada karepotan. Ada krama banjar ajaka patpat luire, Pak Kliang, juru tulis, lan juru arahe marembug indik pajalane lakar majati ka Sengkol.
"Nah, kene Gede, Putu pada makejang. Nyanan uli dini jam empat ngojog malu kumahne Luh Purnama di Praya. Yen sampun panak tiange
