Ngurah lan Lale Dumilah ten bingung buin sawireh rencana pajalanne nganten sampun nyantep. Dina-dina salanturne Gusti Ngurah lan Lale Dumilah cara biasanne masuk kuliah lan ngantor. Makejang pegawene nyalamin raganne ngucapang selamet. Gumantinne Bapak Kepala Cabang daap-deep, wanti-wanti ngucapang syukur sawireh sampun luput uli panca baya. Gusti Ngurah masih ngalaporang yen raganne maan surat kaputusan pindah ka BRI Atambua. Nanging surate hilang anyudang ombak di Ampenan. Kepala Cabang mukak surat-surate ane uli Kantor Pusat ngalihin surat kaputusan pindahe nika.
"Nah, niki surate Dik Ngurah. Saja kapindahane majumu uli tanggal satune ane lakar teka, dadinne buin patbelas dina. Selamet, selamet Dik Ngurah maan kapercayaan mimpin Cabang. Pidan lakar luas?" kenten raosne saha nyalamin Gusti Ngurah Darsana.
"Maksud tiange malih aminggu Pak. Nanging tiang marencana jagi nganten dumun deriki, mangda tiang ten bolak-balik meriki. Nika awinan yen dados tiang nunas cuti tahunan aminggu lan cuti nganten tigang dina," kenten aturne Gusti Ngurah alon.
"Oh, kenten. Melah masih, mungpung cuti. Pidan lakar nganten, tur sira adan calon Dik Ngurahe nika? Nguda ten taen ajak melali meriki, kenalang dong."
"Antuk galahe mepet, tiang jaga nganten ring Budane niki, apang di Saniscarane sampun dadi bebas. Adan calon tiange Lale Dumilah saking Sengkol kari kuliah deriki. Santukan adat lan agamane malenan sulit rasanne tiang mapadik terang-terangan, nika awananne tiang nganten sasiliban utawi merarik cara Sasak. Yen di Bali ngarorod."
"Nggih, dados Dik Ngurah. Tunden ngaenang surat cuti 6 dina, Surat Perintah Jalan lan Surat Keterangan Pemberhentian Pembayaran Gaji deriki. Sejawaning nika Surat Izin Cuti Nganten Dik Ngurah
51
