di natahe ngantiang panyapan sang madue umah.
"Beh, ampurayang Pak Kepala lan jero tamiu sareng sami. Ngiring malinggih dumun. Tiang sajaan kaplegan, tong madaya yen panak tiange luas merarik nganten. Bas mara pesan jam telu ia kari jumah deriki tur papagina teken timpalne lakar mulih ka Cakra," kenten raosne Mamiq Wira. Kurenanne engsek tuara nyidang pesu munyi. Yeh paningalanne nrebes pesu cara ujan riris. Sasampune pada negak Kepala Kampunge lantas ngaturin utusane midartayang indik sasuduk pejatine nganutin rerangkatane secara adat Sasak ane madan merarik, mina kadi secara adat Bali ane kadanin ngarorod.
"Inggih Mamiq, maka anak lingsir sane nuwenang okane Lale Dumilah. Titiang gumanti dados utusan, ngaturang maka sujatine yen Lale Dumilah okan Mamiq punika sampun ka rangkatang antuk Gusti Ngurah Darsana saking Bali, sane malinggih ring Cakranegara. Titiang nunas geng rena sinampura duaning pamargane nganten sasiliban. Nanging puniki wenten surat saking Lale Dumilah katur ring palungguh Mamiq. Dumadak Mamiq ngiceh pamargi okan Mamiq sareng Gusti Ngurah Darsana." Atur Kliang banjar Jeruk Manise sada aris saha ngenjuhang suratne Lale Dumilah. Makelo Mamiq Wiradana bengong mamaca surat pianakne ane nerangang yen pajalanne nganten mula saking madasar tresna lakar nutug Gusti Ngurah Darsana. la tuara bani morahan utawi majalan ulian papadikan sawireh takut lakar nyengahin Mamiq lan Inaq. Pinunasne apang mamiq lan inaqne ngicen pangampura tur redhoang Milah mapamit.
"Beh, sapunapi nggih, tiang deriki ten nyidayang muputang newek. Kari wenten belinne, panak tiange di Praya. Antosang jebos tiang kari nelepon, dumadak ipun nyidayang mulih meriki. Kenten masih wenten nyaman-nyaman tiange lenan sane patut nuwenang," kenten Mamiq
57
