Ngurah Darsana, selamet uli panca baya.
"Nah dong inem malu kopine. Kanggoang sing ada sedakne. Jajane ane aba uli Bali telah anyudang ombak di Ampenan," kenten Gusti Ngurah nanjenin timpalne. Makejang pada nyiup kopinne Uli rurunge saget teka Wayan Galang lan Luh Purnama ngaba toples misi emping malinjo, gorengan lindung, lantas pejanga di arepan timpalne.
"Kanggoang Bli Ngah Sunia sepanan sedakne mara nyemak di kamarne I Luh. Miribang di kamar Lale Dumilahe masih ada nanging makunci," kenten Wayan Galang.
"OoooYan Galang, kaden ada kuncine di laci. Jemak suba dengdenge a toples."
"Araaah, banak perlu mangkin Denda Milah. Niki doang sampun cukup. Yen kari melahan anggon manian," kenten Made Artha. Sampune med macanda lantas pada mulih. Lale Dumilah lan Luh Purnama masih mulih, nanging andeganga apang nyanan petenge pada madaar deriki sawireh kadung liu nyakan, kaden tamiune lakar ngrerep. . Petenge nika maka dadua jakti teka milu madaar derika. Luh Purnama lan Lale Dumilah ngayahin gagelanne suang-suang, ngawe Made Sinar marasa iri ten ada ane nimpalin.
"Beh Mek, inguh keneh tiange nepukin makejang pada ngelah pasangan madaar. Tiang dogen padidi maciplakan, tusing ada nimpalin. Sing jaen rasanne madaar," kenten Made Sinar mapi-mapi cara anak bingung pati garap milihin darang nasine.
"Ngudiang bingung Luh Ade? Jani kaden mula Luh Ade ane enu ngelah tugase ngayahin Tu Ngurah. Tiang sing anak matulung
dogen, dadi tamiu." Lale Dumilah ngajak Made Sinar bareng negak di sampingne. Gusti Ngurah alon ngulgul ngimbuhin.
49
