Sasampune nika Made Sinar lan Wayan Rempuh ngaba sodaane ka bale daja. Nasine enu anget-anget, darangne be awan mabasa magenepan. Ada masanten, mapelalah, lan mapes asem manis. Makejang mangkin madaar marengin tamiunne. Wusan pada ngajengang, aji lan ibunne mantuk ka Tanjung iringa taken Gusti Ngurah teked di buse.
Buka nekepin anduse masih ngenah kedusanne. Kenten masih sanjane nika timpal-timpalne di kantor BRI liu teka nelokin sawireh ningeh orta yen Gusti Ngurah kena panca baya di Ampenan. Ada ngabaang jaja, taluh, gedang, lan susu. Made Artha ane biasanne teka nganggurin Made Sinar, tumben mara nengok sawireh jumahne ada karepotan. Ia sanget pesan mapangenan Made Sinar lan Yan Galang tuara matuturan.
"Tu Ngurah, beh dadi ati ten ngabarang sampun rauh uli Bali tur kasengkalan makapuan. Sebet tiang puk, tumben makatelun ten meriki," kenten raosne Made Artha saha ngelut Gusti Ngurah. Kenten masih timpal-timpalne lenan pada sedih nyalamin.
"Naah, tiang mabuaka ngorahin Yan Galang apang tusing ngorahang tiang teka tur sengkala. Tiang suba selamet. Mani tiang masuk," kenten Gusti Ngurah nanging tuara nyaritayang indik pindahne sawireh suratne ilang anyudang ombak makejang.
"Kaden Tu Ngurah cuti aminggu, nguda dados ngamaluin mawali meriki? Sampun kangen nggih ring," kenten Nengah Sunia ngulgul saha nyledetin Lale Dumilah ane pesu uli paon ngaba kopi ajaka Made Sinar. Made Artha ten makejepan ningalin Made Sinar ane tumben nganggo baju kaos krem ngepas pesan di awakne.
Truna-trunine mangkin pada saling salemper, saling gonjakin saking lega kenehne sawireh timpalne ane paling tresnaina Gusti
