Kaca:Gita Ning Nusa Alit.pdf/53

Saking Wikisource
Kaca puniki kavalidasi

"Inggih Tu Ngurah Gede sampunang malih sumanangsaya. Banggayang titiang sareng sameton banjare iriki sane muputang. Kewanten ring rahina Budane mangda Tu Biang sampun wenten deriki jaga ngupa karain mapag ngantene ring pamesune."

"Kenken melahne Wak? Lale Dumilah napi majalan uli umah kosne deriki, napi perlu mulih apang majalan uli umahne di Sengkol?" kenten Gusti Ngurah matakon.

"Yen ambil patute becikan mamargi saking jumahne ring Sengkol. Mangda nenten katandruhan pejatine. Napi to anggen wiwitan mantuk, mangda nenten ngantos katangehan," kenten Pan Kobar negesang saha nunas panampenne Lale Dumilah.

"Ooh, kabenengan tiang lakar nyemak kamben sekordi pagaen Sengkol jumahne Inaq Dangka ane mula kasub lakar anggon gapgapan teken Gek Sri di Denpasar."

"Beneh Ngurah, manut kramaning anak ngarorod patute majalan uli jumahne. Apang tusing orahanga nyabung di jalan-jalan," Ajinne lan Ibunne milu ngeturin.

"Nggih yen wantah kenten, tiang ajak Luh Purnama jagi ngalaksanain bagiane niki. Pokokne beres sareng pajatine. Skenario sampun puput sutradara sane ngatur," kenten Wayan Galang saling kejitin ngajak Luh Purnama lan Lale Dumilah.

"Nah lamun keto Ibu tusing repot buin. Gagaen Luhe serahang Ibu teken Mbok Rempuh, lan gegaen muanine serahang teken Wak Pan Kobar. Jani tiang tusing nginep dini, lakar mulih malu maitungan apa ane dadi ulehang alih jumah. Kayang dina Budane semengan Ibu suba dini." Gusti Biang Suci lantas nyiup wedangne nganti telah. Gusti Ngurah Gede sampun kenak kayunne. Ane lenan masih milu pada girang.

47