ngelah panak buka cening bisa ngundukang raga yapin kahanane ruwet, sengka tur galahe kapepet cara jani," kenten ajinne saha ngandikain Luh Nari ngaba yeh anget ka kamar mandi lakar masiram. Sasampune nika mara Lale Dumilah mandus lantas sembahyang. Gusti Ngurah masih tuara lali mabakti angayu bagia ring Sang Hyang Widi Wasa ane nyelametang raganne uli panca baya, ngicen pangkat lan jabatan di BRI, miwah dumadak apang sida tulus matemu marabi ngajak Lale Dumilah. Jam pitu peteng mara pada ngajengang. Gusti Biang Suci mabuaka prajani ngae betutu anggon ngisinin bungah kayunne, sawireh okanne selamet lan lakar nuduk mantu.
"Ning waregang ragane ngajeng. Denda tusing dadi elek-elek dini ngajak Ibu. Kaden suba kenal uli pidan bareng ajak Gek Sri," kenten ibunne saha nyemakang imbuh betutu di piring okanne lan Lale Dumilah. Pakremos pada ngajengang saking bungah kayun lan tresnane mawuwuh-wuwuh.
"Nah, yen suba kene ingetang ngabarang mulih teken ibune di Bali apang tusing kaplegan, nadak abaang anak luh mulih," ajinne nuturin matueling okanne.
"Sampun Aji. Sadurunge titiang sampun polih marembug. Nanging durus lan nentene kari ngantos kapastiane sareng Lale Dumilah. Yen mangkin sampun janten sapuniki, benjang jaga telepon titiang Gek Sri ring Denpasar mangda mantuk mataki-taki sekadi rencanane," kenten Gusti Ngurah saha maekang bene teken Lale Dumilah.
"Sampun Tu Ngurah, rarisang ja imbuhin ragane. Niki jangane ja tiang demen," kenten Lale Dumilah saha nyemakang gelanne nasi lan betutu nganti mujung piringne. Gusti Ngurah amung kenyem nyingakin piringne dadi mujung cara gunung. Alon-alon raganne ngajengang nganti telah bersih. Ibunne angob nyingakin okanne kereng pesan.
