Kaca:Gita Ning Nusa Alit.pdf/49

Saking Wikisource
Kaca puniki kavalidasi

Suud ngajeng Luh Nari buin ngaba poh apiring. Lale Dumilah nyemak atebih lantas ia nerusang teken aji lan ibunne ane ngambil pada matebih. Mara lantas aturina galanne.

"Kenken cening nyidang buin ngajeng poh? Ibu tusing ngalarang, nanging yen lebihan nyanan mamarang tusing dadi sirep." Gusti Ngurah amung kenyem nyledetin.

"Bah, yen raganne malih tanjenin, malih apiring pasti telas. Dawage ring Gunung Rinjani raganne sampun nelasang bekela kadung bakat tanjenin. Nanging rauh deriki malih nyidang ngajengang." Lale Dumilah nyaritayang raganne cara Cupak.

"Ooh, keto? Dadinne Ibu ane tusing nawang aba-abaan panak Ibune padidi. Nah yen saja keto dadi suba cening nelahang makejang. Mula acep Ibune mengaang cening. Denda ane suba ngerti teken abah beline apang bisa ngareringa. Eda tuukina dogen yen pinganan suba cukup. Di kapah-kapahe yen katuju mapestaan sing kenken." Ibunne aris nuturin. Sasampune pada suud ngajengang Lale Dumilah milu nampedang ajeng-ajengane celepanga ka lemari makane. Prabote ane momos umbaha teken Luh Nari. Mejane bresihanga. Alep abahne cara jumahne padidi, sawireh ia merasa lakar dadi mantu. Gusti Biang Suci bungah kayunne nyingak calon mantune sragap. Nganti jam dasa pada nutur ngalor ngidul sambilanga makekedekan. Tumben Luh Nari dereng kiap milu nutur, ningehang caritanne Gusti Ngurah ane mula daem, banyol, tur wikan nyatua.

"Kali napi jagi mamargi benjang, mangda becik antuk ngaryanang nasi goreng?"

"Bantes jam kutus. Yen ada be pasih dadi masih panggang anggon be semengan sing perlu ngae nasi goreng," kenten Gusti Biang lantas macelep ka kamarne merem. Sasampune Lale Dumilah macalep ka

43