"Yen manah titiange ngambil ring Budane mangkin, raris mabiakala ring Saniscarane malih aminggu. Ring Somane budal ka Bali, mangda nyidang makala-kalaan ring Wraspatine malih 12 rahina. Ring Reditene malih 15 rahina titiang sampun dados lunga ka Atambua. Indayang Aji nyingakin napi dewasane dados marginin?"
"Nah indik dewasa sing ada alangan. Gumantine di pawiwahanne jumah ento ane mula saja melah. Nanging jani apa baanga pajalane papadikan, apa lakar merarik? Ene perlu selehin apang tatas. Mula keweh pajalane nyuang anak len agama dini. Liu buktinne yen nyama Baline juanga elah, nanging yen nyama Sasake juang jag keweh. Di kenkene suba makurenan bisa buin nagih mulihne," kenten ajinne matadah sangsaya.
"Sampun Aji. Titiang ituni sampun polih ka Sengkol nyaru pamitan. Saking silib murunang dewek masadok ring belinne indik kawentenan titiange tresna ring adinne. Raganne ngwehin tatimbang becikan sampunang mapadikan, santukan reramanne nenten setuju. Taler mangda nenten ngobetin dewekne, becikan pamargine sasiliban, merarik. Nika awinanne titiang ngaturin aji negesang indik puniki ring Wak Pan Kobar. Benjang ngiring Aji, Ibu sareng ka Jeruk Manis mangda polih marembug sareng ipun."
"Nah, keto kone Denda Milah, kayang Budane buin petang dina mara cening saja-sajaan dadi mantun Ibu. Tulusang legane ngayahin I Ngurah." Gusti Biang Suci ngurut-urut Lale Dumilah ane tan pasaur nanging nyantep manggutan meluk ibunne.
"Nah, lamun keto pragat suba rarembugane. Sujatinne meled Aji dini ngaenang upakara, nanging apang tusing ngewehin timpal ceninge, beneh masih jumah di Cakra. Apa buin ene amung masayut di pangkeban, apang aluhan Ida Padanda muputang. Aji bagia pesan
41
