teken Pan Kobar di Cakra."
"Kewanten Ibu, Aji. Manah titiang mangda sapisanan titiang nenten bolak-balik malih meriki, titiang mamanah mangda puput nganten dumun deriki wau budal ke Bali. Jumah lanturang upakarane makala-kalaan, wus punika wau lunga ka Atambua. Punika awanan titiang meriki matur ring Aji minekadi Ibu sane patut mikayunin dewek titiange." Gusti Ngurah Darsana papojolan ature teken aji lan ibunne ane bengong kaplegan.
"Dadinne nyen gumantine tetagon ceninge. Apa Made Sinar, apa Denda Milah? Kenken payu Denda dadi mantun Ibune, Denda?" kenten ibunne nakonin Lale Dumilah.
"Inggih, mangkin Ibu sampun sane ngarerehang titiang kurenan. Sira kayun Ibune, rarisang lemesin mangda nyak ajak titiang lacur, nglelana ngumbara desa, nuduk lampahe sane durung kapanggih." Gusti Ngurah tan mari nyledetin Lale Dumilah.
"Nah keto kone Denda enges? Sawireh Denda ane ajaka mai teken I cening, jani Denda ane pucukang Ibu. Gumanti Ibu ngidih tresnan dendane apang nyak nutug panak Ibune, lascarya nganggon Ibu matua. Nandanin, nundunin, lan nindihin dewek Ibu lan ajine sayan tua dikaduriane. Kenken Denda?" Ibunne ngusuh-usuhin Lale Dumilah.
"Inggih Ibu, titiang jaga nutug Tu Ngurah salampah salakune. Kewanten ampura titiang belog tur wimuda. Sampunang waneh ngicen ajah lan tatuladan." Lale Dumilah lantas makakeb ngeling di pabinanne Gusti Biang Suci ane milu ngawarangin tangis.
"Nah, yen unduk pajalan rerangkatane kenken melahne. Buin pidan rencanan ceninge sawireh galahe suba mepet pesan uli jani." Ajinne matangi ngambil kalender.
