pakaryan titiang deriki dumun, mangda nenteh wenten masalah ka pungkur. Nanging lacur, daweg jaga malabuh ring Ampenan tan maa toyan segarane ngalencok muncrat. Kapale keni angin baret ngantos nabrak jembatan pelabuhane. Muatane pagelantes, titiang kampih nabrak jukung ring Meninting ngantos sirah titiange puniki mabencol. Akeh sane kalebu ring segara tulungina ring bendegane. Titiang taler polih nulungin ngantos 9 diri. Nanging dawege malih mawali katengah tan maa malih uncalanga antuk ombake ka pinggir. Titiang ten eling ring dewek, tau-tau sampun ring RSU Mataram. Sedeng becik dompet titiange medaging kartu penduduk mawinan perawate nyidayang ngabarang ring Wak Pan Kobar ring Jeruk Manis. Wengi titiang wau mantuk saking RSU papagina ring Lale Dumilah sareng sami. Koper lan barang-barange siosan sami anyud. Kapale ngantos mangkin kari kandas ring loloane."
"Ooooh dong keto? Mimiiih panak tiange Ngurah, enu kicen selamet teken Ida Sang Hyang Widi Wasa." Ibunne lantas nangis meluk okanne. Ajinne masih milu sedih.
"Titiang sareng sami bingung jumah. Ten mitaen raganne gelis mawali tur malih keni pancabaya, mawinan gelis natasang ka RSU. Syukur selamet yadiapin ke duurne mabencol. Panumpange lianan taler sami selamet ten wenten sane ngemasin utawi ical. Sami bea rumah sakite katanggung antuk Perusahaan Kapale," kenten Lale Dumilah matur masemu tangis inget teken kahanane ane nibenin gagelanne ibi.
"Inggih antuk kawentenane jumah sami becik, Ibu Ngurah, Gek Sri, Gek Darsini sami seger. Titiang durung ngabarang indike keni baya puniki," kenten atur okanne.
"Terus keneh Ngurahe lakar luas pindah buin pidan? Uli dini terus ka Kupang apa mulih malu ka Bali? Pang melah baan Aji ngomongang
39
