inget yen raganne engsap ngaba sikat gigi.
"Beh Denda, tiang engsap ngaba sikat gigi. Dadi dong nyilih sikat Dendane"
"Sikat? Nika sampun baktan tiang kayang anduke. Napi malih kirang?"
"Ooh matur suksma, nguda tiang dadi pikun jani. Syukur ada ane ngingetang," kenten Gusti Ngurah saha nyigit gelanne. Lale Dumilah makaik gining bangkiangne.
"Beh, Tu Ngurah nakal. Elingang napi pabesenne Memek, nyanan katerusan."
"Kaden dadi nundikin dogen bedik, ngesun bedik ... ah bedik bedik dogen," kenmten Gusti Ngurah saha mecik cunguhne Lale Dumilah ane geregetan malaib pesu.
"Kenapa Denda, dadi kedek? Apa ada ane lucu?" Gusti Biang kenyem matakon.
"Nika Tu Ngurah ituni lali menpenang sikat sareng anduk. Mangkin paling sami gubara tase. Tiang ane salahanga. Syukur sampun baktaang tiang meriki," kenten Lale Dumilah saha negak disamping ibunne. Gusti Ngurah masih pesu malinggih paek ajine. Luh Nari teka ngaba kopi petang cangkir saha jaja lempog keladi kari anget-anget. Angine sumilir, makedus bon kopine nyangluh. Kopi asli tan pacampur mara lebeng.
"Nah dong ajeng kopine, sambilang macerita kenken kahanane jumah dadi suba mabalik mai tonden ada aminggu?" Ibunne lantas nyorogang lempoge teken okanne.
"Sapuniki Ibu lan Aji taler. Mawinan titiang gelis meriki, santukan ngawit malih 15 rahina titiang kapindahang saking Mataram dados Kepala Cabang BRI Atambua ring Timor. Manah titiang jaga muputang
