Kaca:Gita Ning Nusa Alit.pdf/43

Saking Wikisource
Kaca puniki kavalidasi

tiang nutug Tu Ngurah ka Tanjung. Dadi dong yen nutug dogen malu sepalan malajah dadi calon mantu?" Lale Dumilah lantas pesu tutuga teken Gusti Ngurah natad tas ka rurunge. Apang enggal maka dadua menek cidomo ka penambangan. Sedeng melaha ada bus ane lakar majalan. Kari ada kursi suung buin abesik didori. Maseret montore pesu uli penambangan enggak-enggok nuut margane ngamenekang cara lalipi panteg. Napi buin teked di Pusuk panumpange saling dungsel, saling nyungnyung. Kenten masih Lale Dumilah anggona pangus abetne ngelut gelanne. Panumpange lenan milu iri. Di kenehne pada ngadenang sang kalih mula panganten anyar mara mulih uli malali. Utawi lakar nelokin matuanne di Tanjung. Jam tengah lima buse teked di Tanjung. Sang kalih lantas ngojog ka jeronne. Dapetanga ibu lan ajinne sedeng ngisis di brugage.

"Om Swastiastu, Ibu, Aji, sedeng becik pada malinggih. Sapunapi sami kenak?"

"Om Swastiastu. Oh, Ngurah ja ajak Denda Milah. Ibu sing madaya cening suba teka. Kaden ngorahang cuti aminggu mulih ka Bali. Kenken kabare pada jumah? Keto masih Denda nyak milu mulih. Lega pesan keneh Ibune cara maan ulungan bulan. Mai ja menekan bareng negak." Gusti Biang lantas ngelut Lale Dumilah saking asih.

"Jalan ja bale daja negak apang elah mareraosan. Sinah I cening bedak di montor buse maseksek. Tunden ngaenang teh malu," kenten ajinne lantas matangi menekan. Gusti Biang nandan Lale Dumilah ka kamarne Gek Sri ngaba tasne apang masalinan. Sasampune masalinan Lale Dumilah mesuang panganggonne Gusti Ngurah abana ka bale daja di pasirepan biasane yen nginep. Aji lan ibunne amung makenyem, kayunne kenak nyingakin okanne lan Lale Dumilah. Len pesan abahne teken ane sampun liwat. Gusti Ngurah macelep lakar masalinan. Mara

37