lan nunden apang seleg maubad lan masare nuptupang bayunne. Dayu Sutresni marasa maan siraman yeh nyeng matemu ajak Gusti Ngurah lan rabinne. Gusti Ngurah lan rabinne makenyem lantas pesu ninggalang bungkusan jajane di mejane.
Teked jumah dapetanga Meina sampun majengin Gung Nantha di terase. Pak Zakaria lan pak Mustamar mara pesan teka ngajak buruh dadua lakar ngagah peti-peti prabotane ane makirim uli Atambua. Sampun aminggu lebih barange-barange teked di kantor cabang lantas pindahanga ka garasan mobile ngantosang Gusti Ngutah rauh.
"Oh Pak Zakaria, lautang gagah peti-petine ane ada di garase ajak Mustamar. Tiang kari masalinan malu. Mara pesan teka uli Rumah Sakit nelokin timpal ane opname ulian bencana pesawate ibi," baosne saha nundikin okanne ane sedeng ngajeng bubuh.
"Kenken Meina, Gung Nantha sing rewel? Apa suba maan sirep?"
"Sampun maan sirep uli jam 9.00 ngantos jam 12.00 Bu, mawanan tiang maan masak ngantos pragat. Matangi lantas nyusu. Niki wau angetang tiang bubuhne."
"Nah, lamun keto pragatang majengin. Mbok lakar masalinan malu terus ngajeng sawireh kadung kedalon ngorta di rumah sakit. Sing tawang saget suba lingsir," kenten Ratna Dumilah lantas magenti baju
terus ngajengang. Suud ngajengang Gusti Ngurah nyagjagin buruhe magae milah-milah barange saha nentuang tongosne suang-suang. Buku-buku di kamar baca, kramik lan barang antik di kamar tamu, piranti dapur di paon. Prabot pecah belah di lemarine, piranti upakara di gudang. Plangkirane lantas kapasang di kamar pasirepane muah di kamar baca lan di paon. Sesampune pragat Meina teka ngaba kopi lan jaja seadanne. Makejang pada ngopi sambilanga ngorta, gumantine nutur indik bencana ane nibanin pesawat Merpatine, kayang raganne
369
