titiange saking Klungkung. Yen Gung Ngurah saking dija?" Aturne Made Malat.
"Yen tiang mula uli Baledan, nanging kurenan tiange asalne uli Sengkol, Lombok Tengah. Mangkin deriki di BRI Rababima. Dumadak Made enggal seger apang ada ajak mabanjaran pada uli Bali. Nah mesare Made dini! Tiang lakar nelokin Dayu kurenan Madene apang ten sedih sawireh kari ngelah timpal senasib bareng deriki," kenten Gusti Ngurah nupdupang Made Malat apang suud sedih lantas pesu tututina teken rabinne.
Teked di kamar nomor 20 dapetanga perawate sedeng mreksa pasiene. Alon-alon Ratna Dumilah macelep maekin. Sesampune perawate pesu, Ratna Dumilah ngenalang raganne ajak Gusti Ngurah ane milu kasengkalan di patasikan. Raganne masih mara teka uli
kamarne Made Malat ane masih dereng dadi pesu, yadiapin raganne sampun sehat.
"Beh, Bu, Pak Ngurah tiang tumben mriki nanging nemu sengkala kadi mangkin. Manawi niki saking ulah tiang langgana ring ajin tiange, saking ngetohin tresnan tiange, mawinan tiang kelangan pianak," aturne Dayu Sutresni ngeling ngusuh-usuhin wetengne.
"Nggih, sampunang nika selselanga. Kaden ten ja padidi ane bareng sengkala. Tiang masih milu, gidat tiange mabencol. Gumantine mangkin utsahayang apang enggal seger. Kayang nika buin wawanin. Kaden pangalamane nika mula guru ane mautama? Tiang sampun liu ngorta ajak Pak Made indik kawentenan Dayune matemu ajak raganne. Mangkin melahan ngaso apang enggalan seger. Kayang teked jumah ajaka nutur apang liu, sawireh iraga mangkin deriki manyama. Yen maan galah tiang pasti nelokin Dayu meriki," pituturne Ratna Dumilah milu ngembeng-ngembeng yeh panonne. Gusti Ngurah masih milu nyalamin
368
