Nantha ane natakang tanganne.
"Nunaas, terima kasih mbak" kenten ucapanne Gusti Ngurah masaang okanne. Pramugarine garegetan nyubit pipinne Gung Nantha ane sedeng nyiup sirup yeh jeruke. Makejang mangkin panumpange pada madaar lan ngopi. Munyin kapale saget dedeh, di kenkene saget banter cara montore di margane ngregah sawireh nomplok ambubu tebel. Kapale sampun nincap duur Pulo Sumbawane. Juring-juringan alas lan pategalane, saha kota lan desa ane kaliwatin baan margane mabelak-belok cara lelipi gebugin di pasisi kaja Pulo Sumbawane ngilis ngenah uli duur. Len pesan teken iding pasisine di pasihe kelod gumanti kerasa bengang, perahu saha jukung pancingane langah ane malayar. Sesampune pada suud madaar, kotak nasine lantas kaduduk lan mejane ka cakepang. Uli mikropune pramugarine nunden panumpange apang masang sabuk pangaman saha suud ngaroko sawireh kapale enggal lakar madaret. Kapale sayan makelo sayan nganuunang, nanging yadiapin sampun duur lapangane rodanne dereng nyak pesu. Buin kapale mabur ngamenekang beneng kangin nganti joh kapesisin Sapene, terus mabelok kelod buin maputer-puter sambilanga ngutsahayang menangin
apang rodane nyak pesu. Nanging lacur nganti atengah jam lebih tuara nyidaang. Panumpange mangkin dadi pada bingung, pramugarine makenyem maang panglipur apang ten panik, yadiapin pilote sayan runtag. Co-pilote busan-busan ngelap peluhne sambilanga paling limanne menek tuun nyobakin mecik tombol lan ngutak-atik kabele yen ada ane konslet, pegat muah tuara nyambung.
Sesampune makejang kacobak tuara nyidayang, pilote lantas ngubungin AMC lapangan udara Bima, mutusang lakar madaret di pasisin pasih delod lapangane di samping gudang uyahe. Dinas Pemadam Kebakarane apang kasiagaang derika. Pesawate kari muter-
355
