mesin pesawate, lantas majalan di landasan sayan makelo sayan mecatang terus mabur beneng kangin ngambara, sayan makelo sayan negehang nganti ilang uli paningalan pangatehe. Gusti Ngurah Gede ajak rabi lan okanne makiles uli lapangan katututin ben Wayan Rempuh lan pianakne. Kenten masih Lalu Wiradana ajak reramanne kalih rabi lan okanne masih milu ngungun pesu uli bandara ngungsi montorne suang-suang.
"Mamiq, inaq sareng sami, silak ngiring simpang dumun ka Cakra. Tiang masih mangkin Jaga budal ka Bali. Yen wenten galah malancaran simpang ka Dusun Baledan."
"Nggih matur suksma. Tiang taler jaga ka pasar dumun matumbasan, mungpung mriki kapah-kapah. Dumadak sami-sami rahajeng," kenten pasautne Mamiq Wiradana. Makejang lantas pada masalaman, marungang tresna nutug okane ampehang angin.
@&@
Kapal terbange mabur sayan makelo sayan negehang, ngagana duur ambubune. Sesampune cukup tegehne mara ia nyelehseh banban cara pedaune malayar di danune. Gusti Ngurah ane maan kursi paak pintu pesawate ngelahin maan galah ngabih okanne. Ratna Dumilah sedeng iteh matujuin Meina wewengan kota muah desane ane ngenah di pananggun Pulo Lomboke, nganti tuara tawanga pramugarine magiang nasi lan inuman.
"Ngiring Bu, ngajeng dumun!" "Minume napi, teh napi kopi?"
"Ooh nggih, teh manis manten nggih Non?"
"Tiang nunas sirup anggen panak tiange," baosne Gusti Ngurah nujuang okanne. Pramugarine enggal nyemakang sirup enjuhina Gung
354
