barange ane lakar maaba ka Bali. Pan Kobar mesuang krepe anggona wadah siap kurungane ane lakar titipanga Nyoman Bengkel di Baledan. Suud masiram Ratna Dumilah majengin okanne bubuh. Gusti Ngurah mragatang menpen pakeanne ka kopere, sejaba baju bayi lan ane lakar manggo mangkin kari mawadah tas. Meina ngenggalang mandus, magenti baju lantas menpen panganggonne ka koperne. Makejang barange ane lakar ka Bima sampun mapunduh saha katulisin BRI Rababima. Luh Purnama lan Made Sinar nyrepek nyodaang wedang abana ka bale daja.
"Tu lingsir, Tu Ngurah sareng sami durusang ngawedang dumun, sampun tengai. Niki sampun sodaang titiang sedak kasenengane, serabi, dengdeng kaok, cumi magoreng sareng krupuk kebo," aturne Made Sinar saha nundikin bapanne. "Wak, Beli Yan Galang mai ja malu ngopi ngiring Tu Ngurah. Nyanan buin pragatang gegaene."
Makejang lantas ka bale daja ngawedang. Amung Gusti Ayu Sri mara ngambil handuk lantas ka kamar mandi masiram. Made Sinar buin ka paon nulungin memenne mragatang ngae darang nasi. Uli pamesune saget teka rombonganne Lalu Wiradana.
"Assalamu alaikum, selamat pagi Gusti Aji, dik Ngurah sareng sami."
"Ooh, selamat pagi. Om Swastyastu mamiq, inaq, kak sareng sami. Semeng ja sampun rauh. Ngiring rarisang deriki malinggih," sapanne Gusti Ngurah lantas sareng sami nyalamin tamiunne. Ayu Sasih lan matuanne ngejang aba-abaanne lantas nyagjagin Gung Nantha ane sedeng ngajeng bubuh. Agus lan Ayu demen pesan nyanden misanne.
"Inaq, Mbok Ayu, silak di duuran malinggih," aturne Ratna Dumilah nyerahang okanne teken inaqne. Raganne ngenjuhang sisan bubuhe teken Meina apang bresihanga.
351
