"Denda Milah, Gusti Biang, ampura tiang ten makta napi-napi. Kanggeang jaja plemeng lan dengdeng kaok akedik. Bakta ka Bali wenten masih brem lawas, manawi dados anggen ring katuju sasih dingin," ucapne inaq Wiradana.
"Beh inaq bas repot makta magenepan. Tiang sampun lega yen palinggih kayun simpang. Matur suksma ngicen brem, dados anggen matabuh pinaka pangenep upakara. Mriki ja malinggih sareng ngawedang," sapanne Gusti Biang Suci teken warangne.
"Mimiih, tiang wau pisan usan ngawedang di Praya lantas mamargi mreiki."
"Nggih yen kenten niki lanjarane durusang Mamiq," aturne Gusti Ngurah Gede. Wayan Rempuh lan Pan Kobar milu nganemin tamiunne ngorta kangin kauh. Made Sinar lah Luh Purnama nyrepekang mragatang masakane lantas masoda abana ka bale daja.
"Ngiring dumun mangkin ngajengang, mungpung samian durung nyampah," aturne Wayan Rempuh saha maekang piring lan ajeng-ajengane ka tamiunne. Makejang lantas ngajengang. Meina nimbalin Gung nantha apang ten ngulgul ibunne ngajengang. Suud ngajengang lan magenti pakean, Wayan Galang mesuang montor lantas nyelepang barang = barange ane lakar maba ka Rababima. Gusti Ngurah mreksain barange apang ten ada ane kecag. Makejang sampun matulisin tatujone ka BRI Rababima.
"Mamiq, inaq, ibu, lan aji sareng sami, niki sampun jam 9.00 wayahe gelis cech in naftarang tikete. Mangda nenten kasusu, ampurayang ngiring ja mamargi mangkin ka Bandara Selaparang. Sira uning kapale sane ka Bima gelis rauh," aturne Gusti Ngurah.
"Ooh, nggih dik Ngurah. Becikan derika ngantosang. Sira malih
352
