padelengdeng yeh panonne inget teken lakon pitresnane ipidan ngajak rakanne. Luh Purnama enggal ngajakin ngagah kaputanne di samping purane anggon panyampah. Ada ngajeng bubuh ayam, ada serabi lan Meina ngulahang milih blayag lan sate badug. Gung Nantha pajengina serabi teken Gusti Ayu Sri nganti telas baana asibak. Luh Purnama nuturin Meina yen raganne biasa malila cita, mancing ka taman ngajak Gusti Ngurah, Yan Galang katuju libur utawi Minggu.
"Memang asri tamane niki Mbok Luh, yen tiang mrasa ten medmed malali deriki. Di Kupang ten taen nepukin yeh cara deriki, napi buin cara di Bali," raosne Meina polos.
"Saja Meina, pelung yeh telagane dalemne tuah amun katik tunjunge. Nanging dalem keneh manusane tong sida ben nyugjugin, apa buin kasedihanne," pasautne Gek Sri maclepus tan patuktuk pabongkol. Makejang bengong tuara ngerti maksudne, sajaba Gusti Ngurah ane mrasa nek kayunne lantas maekin rainne, mapi-mapi nyemak okanne.
"Suryane suba endag, jalan mulih malu apang maan mataki-taki. Buin jebos inaq lan mamiq rauh uli Sengkol," kenten Gusti Ngurah saha nyemak okanne uli pelukanne Gek Sri. Makejang mangkin majalan marerod pesu uli taman, ninggal telagane makebat kapu-kapu lan tunjung nedeng mabunga. Mujair lan guramine pakecoscos nyanderin capunge makonceng. Suryane kangin ngintip ngetuhang damuhe di muncuk padange. Teked di Jeruk Manis, Gusti Biang Suci sampun sayaga nyediaang yeh siram putunne. Yan Galang lan Made Sinar ngomel sawireh tuara ajaka milu jalan-jalan ka Mayura.
"Tuagung, tunas Gung Nantha jaga siramin dumun. Toyane sampun sedianga antuk Tu Biang saking ituni," aturne Meina lantas nyiramin Gung Nantha. Gusti Ngurah lan Ratna Dumilah masih ngenggalang ka kamar mandi masiram. Aji lan ibunne matetamped munduhang barang-
350
