memenne masare. Pan Kobar ajak Wayan Galang nylempang di ampike ngisis sawireh ia kari punyah. Kasuen-suen gerungan montore di jalane sayan sepi, gerokan angkihanne Pan Kobar macandetan ajak panakne Yan Galang. Makejang sampun aris, amung Gek Sri lan Luh Purnama ane kari ngrumpi makisi-kisi.
Maninne semengan Wayan Rempuh lan Pan Kobar sampun bangun ngendihang api di paon. Selanturne Gung Nantha masih matangi ngindeng teken ibu lan ajinne di natahe lantas pesu ka rurunge. Kadung kabiasaanne uli alit di Atambua sabilang semengan ajaka jalan-jalan. Mawanan mangkin yen matangi rahanne nyujuh nagih pesu karurunge. Teked di pintu kosne Luh Purnama saget macelig pesu. Luh Purnama, Gek Sri lan Meina lantas nyangkol Gung Nantha ajaka ka margane gede. Beh mrengang Gung Nantha nyingakin montore kari ngendih lampunne kangin-kauh. Gusti Ngurah lan Ratna Dumilah alon-alon madandan nutug bajang-bajange meli serabi di batan sukune. Suud mablanja meli serabi, bubuh ayam, lan sate badug lantas mulih pada ngaba kaputanne suang-suang. Gung Nantha nlekep di pelukanne Gek Sri kadinginan.
"Mbok Ratna, kenken mulih mangkin napi kari jalan-jalan?" Patakonne Gek Sri.
"Margih ja lanturang majalan buin abedik ka Mayura. Makelo ten taen merika. Meina masih dereng nawang kasrian tamane deriki. Mungpung kari semengan," kenten pasautne Ratna Dumilah saha ngelut Gek Sri ane nyingal okanne, belokanga nganginang. Di Taman Mayura raganne majalan mirig telagane nganti di sisi kanginne. Meina tuara med-med ngalingling kasrian tamane ane luwihan teken Taman Giline di Klungkung. Gek Sri teked di batan manggise nadak bengong
349
