leleh. Kemetang alih galahe yen suba masa subur," pituturne Gusti Ngurah teken timpalne maka dadua.
"Inggih boss, sayaga ngalaksanaang. Laporane nyusul," aturne Nengah Sunia sada acreng sebengne matadah kimud. Bajang-bajange masih lega maan kuliah seks gratis. Nanging bina teken Gusti Ayu Sri ane sayan sedih, engsek ngepil ngurik piringne nasine kari masisa atenga disampingne Luh Purnama. Kayunne bungah ngelah sameton penter, polos, jujur tur jemet makarya dadi tatuladan nyama braya. Nanging pitrasnanne teken rakanne tong sida baan ngengsapang. "Oh, bagia pesan Ratna Dumilah nampanin."
Petenge sayan sepi, Gung Nantha sampun engkis sirapne jangkutina ring nininne. Wayan Galang lan Nengah Sunia sampun nyiup gelas birne ane kaping telu panelahne. Di paon masih Pan Kobar lan Gusti Ngurah Gede sampun usan malagaran. Tuake kari genekanne dogen di dasar cekelne. Truna-trunine pakrimik saling tundik mawangsit.
"Inggih Tu Ngurah, niki sampun jam dasa. Yen panjangang rasa kirangan wengi tiang nunas warah-warah. Nanging benjang Tu Ngurah sareng sami sampun lunga adoh. Dumadak mangda rahajang rauh ring Bima. Sira uning pidan polih mantuk mriki malih. Mangkin tiang sareng sami mapamit dumun. Matur suksma antuk kuliahe wau. Sapunika taler Gek Sri sane jaga mantuk ka Bali, dumadak mangda gelis lulus tur mawali dados dokter deriki," kenten aturne Nengah Sunia lan timpal-timpalne lantas masalaman pada mapamit pesu ka rurunge. Made Sinar, Luh Purnama, Meina, lan Wayan Rempuh nampedang piring, gelas, botol muah sisan ajeng-ajengane abana ka paon. Sesampune bresih makejang lantas ngojog kamarne suang-suang. Gek Sri magumana nginep di dununganne Luh Purnama apang maan nutur ngempahang kangenne makelemah. Meina ajak Made Sinar madandan nutug
348
