utawi karma ane nguduhang. Yen suba jelek karmane, kija laku ngalih tetep tepuk ane buka keto. Perlune nawang patemuan tuah apang iraga bisa mulat sarira, ngerti teken siman jodo iragane."
"Yen Tu Ngurah sareng Jro Mekel Ratna temu kuda? Dados masih cingakin patemun tiange sareng niki, ha ha ha sareng Bli Wayan?" Patakonne Luh Purnama alon.
"Baah, patemun yange nembelas. Tusing magumana milihin, mara balihin otonne jag suba keto. Mawanan sing ngelah apa, sejaba nyama braya pada asih. Kija laku maan dogen timpal yadiapin ada dogen anak ane tuara demen. Nanging yen patemun Luhe ajak Yan Galang suba taen balihin tuah temu solas, artinne kapradnyanan, sing keto Yan?" pandikanne Gusti Ngurah ngalanturang. Luh Purnama nolih gelanne saha ngigit paanne.
"Neeh, upah nagih nawang padidi. Apa bli takut buungang yen patemune jelek?"
"Sing keto Luh, pang cara Tu Ngurah subane nganten mara nyantep tuturang."
"Yen kenten indayang cingakin patemun titiange Tu Ngurah?" aturne Nengah Sunia lan Made Artha saha ngorahang otonne suang-suang. Sesampune corat-coret nepukang urip dinane Gusti Ngurah makenyem nerangang patemunne suang-suang.
"Nah, ene patemunne Made Artha melah pesan, temu telulas ada ciri-ciri lakar dadi sugih. Kabenengan kurenanne dadi dagang baas. Yen ada bati ingetang nabung lan ngulehang apang dagangane setata lancar. Yen Nengah Sunia kanggoang temu pitu ane nguduhang suka dukane tuara belas. Sing ada alangan tusing ngelah pianak. Patut tetep ngutsahayang apang sehat malu. Tunain malu magae apang tusing
347
