mamongah ngalemesin ipun sane polos nyak mabalik ring tiang. Raris tiang nganten sampun nem sasih mangkin. Pula-paline samian karemba antuk truna-trunine deriki. Miarthie mangkin sedeng abot, nanging tetep kari nulungin memenne madagang ring pasar," kenten raosne Made Artha.
"Nggih Tu Ngurah, Gek Sri. Tiang tetep kari matimpal sareng Miarthie lan beli Made Artha. Yen wenten perlu ipun sering mantuk meriki. Titiang mula kari mamanah masuk, mungpung memek nyak nyangunin titiang," pasautne Made Sinar kenyem.
"Inggih banggayang Tu Ngurah, jaga tutug titiang sasida-sidaan manah ipune malajah, santukan belin ipune sampun makarya iriki. Ipun mangda ngawakilin titiang mantuk ka Baledan, utamanne mangda sida ngaula ring jero kadi sane sampun-sampun."
"Nah, nika mara ja madan sayang teken panak Mek. Napi buin panak luh, yapin ten nyidaang mekelin tegal, carik, utamaan yen mabekel kabisan dadi anggona salawase. Apang bisa ngaba awakne tur dadi tatuladan jumah matuanne," pituturne Gusti Ngurah.
Made Sinar, Luh Purnama, lan bajang-bajange lenan sayaga mesuang ajeng-ajengane uli paon ka bale daja. Wayan Galang lan Nengah Sunia milu epeh nyacarang gelas, mukak botol bir saha ngebatang tikeh apang linggahan tongose malagaran. Pan Kobar wangsitina teken kurenanne apang ngiring anake lingsir makiles ka paon.
"Ngiring Tu Biang sareng Tu lingsir ring paon ngayunang. Banggayang bajang-bajange malagaran iriki sareng Tu Ngurah," aturne Pan Kobar saha ngaba tuak aklukuh. Gusti Ayu Sri nimbalin Gung Nantha uli pabinan ibunne lantas abana ka bale dangin.
"Nah, mangkin mareren malu ngorta. Jalan madaar malu ajak
340
