makejang sawireh sampun peteng. Patemune niki masih satmaka ngenalang Meina Victoria adinne Wayan Galang apang tawanga teken timpalne Yan Galang makejang," raosne Ratna Dumiiah ngajakin tamiunne apang pada madaar. Gusti Ngurah nyontoin si malu nyemak piring, lantas briyukina teken timpal-timpalne. Rame kecapanne ngrasayang jaen masakane tuah kasor dening kaliangan manahne marerasan ngajak sawitrane ane lawas tan matemu.
Kedeke di bale daja busan-busan mabriag yen Nengah Sunia ngigel Nyakepung ngajak Yan Galang ane matadah cara punyah. Gusti Biang Suci sedih kayunne nyingakin Gek Sri tuara milu girang, lantas ngenggalang usan ngajengang nyagjagin okanne.
"Gek Sri, nguda ngejoh nagak. Kema ja milu mapestaan mungpung sedeng rame magegonjakan satmaka ngempahang kangene. Depin Ibu ngajak Gung Nantha."
"Banggayang Bu, tiang kadung kangen ngajak Gung Nantha.mBerat rasanne benjang kalahina ka Bima. Napi malih raganne dereng sirep. Cobak cingakin kenyemne niki lho Bu ngawe keneh tiange trenyuh, garegetan," aturne Gek Sri saha ngecup okanea. Alon raganne ngindengang, ngendingang, ngundangang angin aris apang enggal sirep. Saking aripne Gung Nantha sirepanga di bale daja jangkutina teken nininne. Gek Sri lantas milu ngajengang, nyelag malinggih disampingne Luh Purnama lan Made Sinar.
"Nah, mangkin sedeng becik wenten Gek Sri calon dokter, wenten Tu Ngurah lan rabinne sane sampun mapengalaman, wenten calon penganten lan truna-truni siosan sane manawi sampun madua gegelan. Tiang sareng Made Artha sane kantun panganten anyar perlu matur. Napi awananne kurenanne Dek Artha sampun beling, nanging kurenan tiange dereng? Mungguing kawantenan tiange sami-sami seger-oger,
341
