atiban tengah mapalasan. Nengah Sunia sampun nganten ajaka Nyoman Nerti dagang blayage di Taman Narmada. Made Artha masih sampun nganten ajaka timpalne di SMA ipidan ane madan Mia Swan Tie alias Miarthie, dagang berase di Pasar beras Cakra.
"Ooh, dadi ati pesan Nengah, Made pada tusing maang kabar mara tiang joh. Yan Galang masih ping kuda ngirim surat ka Atambua sing taen ngortaang timpalne nganten. Sing keto ada anak ane sakit hati, utawi polak panyayang, De?" Patakonne Gusti Ngurah saha nyledetin Made Sinar ane teka ngabaang kopi ajaka Meina lan Luh Purnama.
"Maksudang Tu Ngurah titiang sakit hati, polak penyayang? Nenten Tu, titiang kari wimuda, kari mamanah ngalanturang ka AKPER Denpasar sesampune tamat SMA. Tiang kadung majanji ring Tu Gek Sri jaga nutug ka Bali," aturne Made Sinar nyantep.
"Ooh, keto? Pantesan uli iraga mara teka, Made Artha sing taen teka midang mai. Nguda ipidan Made sing taen ngorahang magelan ajak Miarthie. Malah ja bakat pacuk-pacukang ajak Made Sinar," kenten Gusti Ngurah nyelag saha mrasa raganne salah.
"Wiakti Tu Ngurah, duk punika tiang mula sampun pegat, ten kari magegelanan. Nika awananne tiang mamanah ngiket tresna ring Luh Ade. Nanging Luh Ade nenten naen nguwehin ka pastian nerima dewek tiange. Antuk alasan raganne kari alit tur kari mamanah ngalanjutang kuliah ring AKPER Denpasar. Memen tiange ngaptiang mangda tiang gelis nganten, santukan adin tiange ane luh sampun nganten. Nika awinanne tiang secara terang-terangan ring Luh Ade, Memek Rempuh, Pan Kobar, lan Yan Galang yen tiang jaga numunin nganten. Yadian wangde makurenan, nanging tetep kari matimpal. Wiwitane tiang bingung santukan ten madue gagelan. Sakadi pituduhing Widhi Mia Swan Tie taler dereng madue kurenan. Nika awinan memen tiange
339
