Malam Minggu umahne Pan Kobar nadak rame. Timpal-timpalne Wayan Galang di BRI muah truna-truni Banjar Jeruk Manise teka nelokin Gusti Ngurah Darsana ajak rabinne ane nginep di Jeruk Manis saha buin mani lakar lunga ka Rababima.
"Beh,Tu Ngurah dados meneng ten pesan ngicen gatra yen sampun limang raina mantuk meriki. Wayan Galang ituni maosang ngambil tiket pesawat kanggen Tu Ngurah benjang ka Rababima. Dadosne, nggih ampurayang tiang kasep nelokin mriki," kenten Nengah Sunia lan Made Artha maselselan saha nyerahang bungkusan lan bier akerat.
"Tiang mula tusing sempat ka BRI sawireh mara teka dina Minggune lantas buin maninne ka Sengkol majango kumah matuane. Terus nginep di Praya awai. Mulih mai dugas Budane, lantas buin ka Tanjung kanti ituni mara mulih. Ento awananne kayang meli tiket Yan Galang ane ngalihang," kenten pasaurne Gusti Ngurah nerangang indike. Ratna Dumilah maekang okanne sig timpal-timpalne. "Ne Bli Nengah hasil tiange luas."
"Naah, niki ja mara putra linuih, batine ngumbara desa. Sira pesengan anake alit Jro Mekel Ratna?" Patakonne Made Artha saha nyemakin Gung Nantha.
"Anantha Bhuwana, adan tiange Oom," Ratna Dumilah nyahutang okanne.
"Badah, cocok pisan, santukan embas di Atambua," kenten truna-trunine masaut ngajumang pesengan okanne. Pamuputne Gung Nantha saling genti ane nyingal satmaka dadi piala magilir. Mula tabah, anake alit kayun dogen jemaka teken truna-trunine. Rame gagonjakane saling tembungin, saling caritain pangalamane suang-suang sesampune ada
338
