Gusti Ngurah Gede, sareng Gusti Made Getas minakadi Gusti Ngurah Darsana indike ngitungang pasemetonane apang sami adung, paras-paros.
Mabinaan teken nika kayunne Gusti Ayu Sri Wahyuni mantuke ka Jero Tanjung ngawe rasa trenyuh alah sitsit, sawireh pitresnanne ane mabunga-bunga buyar malarapan sujatinne raganne tuah kari masemeton sodet tunggal ari-ari teken Gusti Ngurah Darsana. Len pesan taken Ratna Dumilah, gumanti di Jero Tanjung niki raganne maan ka pastian patemunne karestuin antuk Aji lan Ibunne, nutug pitresnane ane mabunga di Rinjani.
Di dina Saniscarane Gusti Ngurah Gede sareng rabi, oka, mantu, lan putunne sami sesampune muspa di mrajan lantas mamargi ka Cakranegara. Rainne ngatehang teked di panambangan. Barang-barangne cukup makeh, santukan raganne jagi netep di Janaloka. Tan caritanan di jalan, jam dasa Gusti Ngurah sampun rauh di Jeruk Manis. Dapetanga Made Sinar lan memenne sedeng repot di paon ngae darang nasi. Pan Kobar ngulat kisa wadah slap lakar titipanga kanggon Nyoman Bengkel, muah wadah brem, lan madu kanggen Gusti Biang Ngurah. Gapgapan sane makirim ka Bima sampun mawadah dose mategul rapi. Meina ngulahang ngumbah pakeanne Gung Nantha apang mani sampun pragat masetrika. Ratna Dumilah majengin Gung Nantha sawireh sampun disne ngajeng. Gusti Ayu Sri sareng ibunne ningkes barang-barange sane pacang ka Bali. Gusti Ngurah Darsana menpenang panganggene dados duang koper lan barang barange lianan malih mawadah dose. Sisanne benjang pacang kawadahin tas.
"Beeh, liu masih barange. Mirib lakar kena biaya barang lebih buin duang tas," kenten pandikanne Gusti Ngurah ngrenggeng ngitungin barange maliah. Ratna Dumilah makenyem ningalin rabinne kipak-kipek
337
