"Inggih Gusti Aji boya ja punika sane momotang tiang. Kewanten sampun rauh okane sareng pianak tiange, napi malih sampun wenten cucu, tiang sampun bagia,"aturne Mamiq Wiradana alon kapatutang antuk rabi lan okanne Lalu Wiradana.
"Inggih, rauh tiange sareng sami gumanti nunas geng sinampura antuk pamargin pianak tiange sareng okane Lale Dumilah budal tan papamit sane ngawinang mamiq sungkawa. Ledang mamiq e gumanti mangkin tunas tiang," aturne Gusti Ngurah Gede.
"Beeh, sampunang ja malih manjangang indik punika!, Ngiring ja sami duwenang, manawi sane sampun lintang wenten sane iwang panampen," pasaurne Mamiq Wiradana kapatutang antuk Inaq Wira. Gusti Ayu Sasih lantas rauh ngaba wedang lan sanganan.
"Nggih dik Ngurah, Gusti Aji sareng sami ngiring ngawedang dumun. Puputang pabligbagane asapunika," panyapanne Lalu Wiradana nyilahang tamiunne ngawedang. Makejang mangkin nyiup wedangne saking pada liang kayunne. Inaq Wiradana tuara medmed niman putunne ane krakak-krikik ngempahang kangen Ninikne. Ratna Dumilah miwah Gek Sri lan Meina milu kapaon nulungin Ayu Sasih masak ngae jukut, ngoreng taluh, dengdeng kaok, pindang lan kacang, ngulah enggal pragat anggen ngajeng siang.
Sesampune sayaga sodaane lantas kaba ka kamar patamiuan apang linggahan tongose madaar. Piring, gelas yeh inum mawadah teko masih sampun sedia makejang.
"Ngiring Gusti Aji, Gusti Biang sareng sami sapisanan ngajengang dumun. Niki sampun siang. Nanging kanggeang ring dusun wentene amung jangan sane katur," kenten Inaq Wiradana ngaturin tamiunne ngajengang. Ratna Dumilah ngambil okanne uli pangkuan inaqne lantas kapasusuin. Makejang mangkin makisid ka kamar patamiuan.
327
