Usan pada madaar Inaq Wira mesuang pisang ijo lan poh madu manis alapan di tegalne. Mangkin giliranne Ratna Dumilah lan Gusti Ayu Sasih ane madaar di paon. Okanne serahanga teken Meina lan Gusti Ayu Sri ngindengang di brugage. Anake lingsir-lingsir pada ngorta saling caritain kawentenane di Bali lan di Sengkol katuju sasih panese niki.
Nandes jam satu siang, Gusti Ngurah Gede sareng rabinne nunas mapamit lakar mantuk ka Tanjung. Kenten masih Lalu Wiradana lan Ayu Sasih milu mapamit ka Praya.
"Mamiq, Inaq Wira sareng sami, tiang mangkin mapamit dumun ka Cakra ngraris budal ka Tanjung mungpung kari selid. Pan Kobar sareng kurenanne taler mapamit. Banggayang okane, mantune sareng putune mangda driki nginep. Tiang matur suksma pisan antuk kaledangan mamiq sareng sami narima lan ngampurayang oka kalih mantun druwene," kenten aturne Gusti Ngurah Gede sareng rabine kapatutang antuk Pan Kobar, saha matangi nyalamin mamiq lan Inaq Wiredana miwah Lalu Wiredana lan Ayu Sasih.
"Silak Inaq, mamiq lan mbok Ayu Sasih tiang pamit," ucapne Gek Sri nyalamin.
"Ooh, kaden ja Gusti Ayu Sri nginep malu deriki," patakonne Inaq Wira alon.
"Nggih ndik inaq, tiang milu ibu ka lanjung mangkin. Wenten sane perlu derika. Mbok Ratna, bli Ngurah lan Meina tiang pamit," aturne Gek Sri tan mari ngecup okanne. Pan Kobar ngidupang montorne, lantas alon-alon ninggalang gumi mandalikane.
"Mamiq, inaq, dik Ngurah lan Denda Milah tiang masih milu mapamit mangkin ka Praya. Sampunang lali singgah mani di Praya," kenten raos ipahne madaadah. Gusti Ayu Sasih garegetan nyubit
328
