kurenanne nglaut nyilih montor dinase. Ajahan pesan raganne sampun mawali ngaba montor ngajak kurenanne Gusti Ayu Sasih.
"Silak dong rarisang ajengang wedange Bu, Aji sareng sami," aturne Ayu Sasih teken tamiunne. Tan kaliwatan dane ngelut Ratna Dumilah lan ngecup Gung Nantha. Sesampune mareraosan ajebos ngempahang kangenne lantas ngalanturang pamargi terus ka Sengkol kadi acepe lakar mlaku pelih teken reramanne. Langite sedeng kedas samplah dugase teked di pekaranganne. Ane simalu tuun tuah Lalu Wiradana lan Gusti Ayu Sasih tan mari nyingal Gung Nantha morahan teken mamiq lan inaqne.
"Inaq, mamiq sira ke niki gagah, siteng pesan?" Aturne teken inaqne ane bengong ngiwasin mantune ngajak anak cerik. Uli pamesune buin teka Ratna Dumilah matututan rabinne, aji lan ibunne muah iringan ngaba sokasi. Mara raganne tuun nyapa tamiunne.
"Ooh, anakku, mantuku, cucuku rauh," ucapne Inaq Wiradana nyemak cucunne.
"Ngiring, silak melinggih deriki Gusti Aji, Gusti Biang lan Gusti Ayu muah bapa sareng sami. Kanggeang kari magrudugan dereng mabresihin laad nyemuh kedele wau," sapanne Mamiq Wiradana nyagjagin Gusti Ngurah Gede sareng rabinne maka besanne.
"Inggih Mamiq, ampurayang tiang rauh tan pawangsit. Mungpung polih galah," pasaurne Gusti Ngurah Darsana lan ajine lantas malinggih. Pan Kobar lan kurenane, kasarengin antuk Gek Sri lan Meina ngaba rarapane di ampike mara lantas malinggih.
"Ampurayang mamiq lan inaq kanggeyang rarapane mangda kewanten maciri." Aturne Gusti Biang Suci lan Wayan Rempuh saha ngarepang sedah pacanangane.
326
