Inaq mangkin sampun mebasang tiang ajak Ratna Dumilah lan Gung Nantha mulih. Maka saksi gumanti Wak ajak Memek lakar ajak tiang milu luas mrika. Napi perlu buin ngajak krama banjare mrika?"
"Becikan sampunang. Mangda nenten ngawinang raganne elek, bas ketara narima mantu lan okanne mantuk. Kanggeang sasiliban ngiring anak lingsir lan titiang sareng kaulane I Rempuh ngiringang, makta rarapan sawentene," aturne Pan Kobar negesang saha nunden kurenanne malihin rarapane ane titipanga uli Bali teken Ibunne.
"Inggih cukup, mangkin iriki wewehin sanganan sareng minuman mina kadi base buah pinaka panginang sategepne anggen taled atur," aturne Wayan Rempuh negesang. Sasorene nika makejang kaperluane sampun kacukupang antuk Gusti Biang Suci lan Wayan Rempuh apang buin mani semengan kari majalan dogen.
Benjangne, semengan sampun pada matangi, masiram, ngawedang lan nyampah, Pan Kobar lan Wayan Rempuh sayaga menpen bebandarane ka montore wenten limang sokasi sareng minuman limun alusin. Jam kutus raris mamargi ngojog Lalu Wiradana di Praya. Sedeng melaha raganne ten masuk sawireh ibi sanja maan majaga di RSU Praya.
"Selamet pagi kak Wira, napi ten masuk dadi kali mangkin kari jumah?"
"Ooh, dik Ngurah lan denda Milah ja rauh. Kali napi mantuk uli Kupang? Tiang kabenengan polih majaga ibi sanja mawanan mangkin giliran libur," sapanne Lalu Wiradana, lantas nyalamin tamiunne makejang saha nunden roangne ngaenang wedang.
"Silak ngiring malinggih dumun, tiang ka RSU ngalih Yuk Sasih apang mulih," kenten Lalu Wiradana lantas pesu ka RSU ngalih
325
