Dereng pragat Gusti Ngurah mahbahang rencananne saget teka Made Sinar uli peken mabelanja. Mara tingalina ane rauh rombonganne Gusti Ngurah lantas ngenggalang ia malaib ngejang bablanjanne, lantas nyagjagin Ratna Dumilah ane ngabin okanne.
"Ooh denda, ah ampura Jro Mekel Ratna, niki Gung Nantha? Mimiih bagusne Tiang sareng sami ngantos iratu, rarisang dumun wedange," ucapne Made Sinar nyarere tamiunne lantas ngecup pipinne Gung Nantha. Nanging uli rurunge teka Wayan Galang ngaba bunga anggrek. Tengkejut masih ia nepukin tamiunne sampun rauh di jumahne.
"Badah, Tu Ngurah ja sampun rauh. Banak nyangka kali mangkin sampun rauh, kaden benjang ngangge kapal terbang?" Aturne Wayan Galang nyalamin tamiunne sami. Pas teked di arepanne Meina ia mandeg tur nguratiang saha matakon teken Gusti Ngurah.
"Niki ..., niki sane nikayang Tu Ngurah, ipun ..., Meina?"
"Aa Yan, ia suba adin Wayane. Meina, ene suba beline, Leonardo Tondoan ane jani madan Wayan Galang, buka isin surat wasiat Mamakmu," pituturne Gusti Ngurah. Wayan Galang lan Meina tuara nyidaang ngampet kenehne lantas saling peluk, saling sulsul ngempahang kangenne, nyampuhang yeh paningalanne saking bahagia lan liange. Makejang ane ningalin milu ngawarangin sedih. Made Sinar ane mara ningeh kahanane nika milu ngelut Meina. Meina tuara nyidaang mesuang munyi, ngeling sasenggukan.
"Nah, Yan Galang lan cening Meina suud malu ngeling. Wayan masalinan malu, nyanan buin wawanin macarita apang maruntutan tuktuk bongkolne," pitutur memenne. Wayan Galang masugi lantas masalinan nganggo kamben milu negak di bale daja.
"Yan Galang ajak Luh Ade, kemo suba madaar malu apang sing
320
