nyambil ngindengang Gung Nantha.
"Nah, nguda ento sangetang, kaden tiang suba biasa mai," pasaurne Gusti Biang Suci saha malinggih di bale daja. Pan Kobar nulungin Gusti Ngurah lan Meina ngaba koper-kopere ka bale daja lan bale dangin. Ratna Dumilah milah-milah barange ane lakar maba ka Bima ajak ane lakar maba ka Tanjung lan ka Sengkol, muah gapgapane deriki.
"Nah jani suba pragat, mainang beli ane ngiring Gung Alit. Memenne kemo malu ka paon sodaang wedang. Ngiring Tuagung Alit," ucapne Pan Kobar nunden kurenanne.
"Niki sira Jro Mekel, dados nembe panggih? Napi niki kocap adinne Yan Galang sane nikaang di surate?" Patakonne Wayan Rempuh nguratiang Meina ane kari bengong.
"Nggih Mek, nyanan ajaka macarita pang lantang yen sampun pada matemu. Nah Meina kema tulungin ka paon masoda. Ene suba mek Rempuh lan Pan Kobar ane dadi reraman beline," kenten pasautne Ratna Dumilah ngenalang. Wayan Rempuh ngelut Meina kausuh-usuhin. "Mimiih, payu masih cening teka, memek kangen ningeh ortane."
Sesampune pada ngarepin wedang, lan Gung Nantha pangkuna teken ibunne masusu. Pan Kobar matur:"Inggih Tu Ngurah sareng sami rarisang dumun ngawedang. Kaulane malih jebos manawi rauh. Titiang sampun tan sabar miragi gatran druwene ring surate."
"Nggih Wak, tiang mulih ka Bali sampun aminggu. Suud ngotonin Gung Nantha tiang maan masih ka Denpasar lan mulih ka Janaloka nelokin Tunini. Rencanan tiange di Sasak aminggu apang maan melaku pelih teken matuan tiange di Sengkol ane sampun nadiang tiang mulih mangkin. Pang maan masih ka Tanjung, mara luas ka Rababima."
319
