Suud ngajengang Gusti Ngurah menek ka loteng nelokin ajinne. Dapetanga makejang sampun pada sirep nyaleleg di samping barang-barangne. Kapale sampun makibeh ngungsi pelabuhan Lembara Gelis raganne ngalih tongos malinggih di bangkune paak kasisi apang terang ngenah Enjung Bangko-bangkone satmaka muncuk cunguh Sasake, Gili-giline di Pelangan lan Sekotong Kauh, nganti macelep ka Teluk Lembar di tongos pelabuhan kapale ane teduh, tenang uli gebyuran ombak lan angin ribut ane biasa ngusak asik kapale yen malabuh di Ampenan. Klibiran toyane ening maglanaran satmaka telaga linggah kateduhin punyan-punyanan ngarembun di pasisin idinge nginggil sisih kelod.
Jam satu kapale malabuh di Lembar. Magrudugan anake saling paliwat tuun pada ngalih montor ane muat ka Cakra utawi Mataram. Gusti Ngurah milihin buruh patpat ane ngaba barangne teked di montore ane lakar ngaba raganne ka Cakranegara. Sesampune mayah ongkos buruh montore lantas magerus majalan ninggalang pelabuhan Lembare.
Teked di Jeruk Manis sampun lingsir. Pan Kobar lan kurenanne masuryak liang kenehne.
"Mimiih, niki ko Tuagung Alit sane antos-antosang titiang. Cenat baong titiange dengak-dengok uli ituni. Ngiring Tuagung, ngiring sayang," aturne Wayan Rempuh tuara ngalinguang ane lenan nyongsong bungan manahne ane singala teken Meina. Gung Nantha masih polos jag masriut nyujuh jemaka teken Wayan Rempuh.
"Aah, memenne, dadi masepan-sepan. Aturun anake malu dane malinggih."
"Beeh, wiakti kanti engsap ngaturin mlinggih. Nanging kaden niki mula druwen raganne. Kanggena dija kayunne malinggih," aturne
318
