sokasine.
"Nggih, aji deriki ngajengang sareng Gek Sri lan Meina. Titiang maktaang ibu sareng Ratna ring kamare di tengah," aturne Gusti Ngurah lantas natad botol lan sokasi ka kamar rabinne. Kayunne wiakti trenyuh nyingakin rainne kaperanan yen eling teken gegambaran pitresnanne ane pupus saking raganne masemeton. Teked di kamare dapetanga okanne sedeng sirep aris pesan kaapit ibu lan nininne. Alon-alon raganne malinggih di kursine saha nundun Ratna Dumilah apang matangi.
"Bu, bangun malu, ene suba jam roras, suba waktune ngajeng siang. Kapale mara pesan ngaliwatin arungan. Tiang ngaba nasi kaput ajak yeh. Iraga ngajeng dini dogen," kenten pandikanne Gusti Ngurah nundun rabinne. Ibunne masih milu matangi.
"Kenken ning, suba teked dija jani kapale? Pules ibune lelep gati, tusing mrasa kapale majalan. Apa mula sing ada ombak? Biasanne lancute keras yen megat arungan."
"Niki sampun siang Bu, arungane sampun lintang. Mangkin ngajengang dumun, niki sampun baktayang tiang nasi kapute sareng toya," atur okanne saha mesuang nasine.
"Inggih dong Bu, tiang sampun seduk ituni durung nyampah. Amung nunas kopi sareng roti manis asiki," aturne Ratna Dumilah saha nyemak kaputane lantas madaar. Ibu lan rabinne masih ngagah nasi kapute pada mabesik lantas makeremosan ngajengang.
"Nah, ento kaden enu buin abesik anggon imbuh. Cening Ratna raga masusuin perlu lebihin madaar apang ngelah bayu," pandikan ibunne saha ngagah kaputane buin abesik edumanga teken okane lan mantune. Gusti Ngurah kenyem-kenyem maan imbuh.
317
