umah muah druwen anake lingsir ane enu masisa patuta cening ane ngingetang. Ibu suba mawak tua, patutne jani pensiun. Yen cara Baline suba nyandang nyalanang wana prasta," pandikan ibunne.
"Inggih, punika awananne Ibu sampunang bes tuyuh. Napi sane elah antuk Ibu ngambil rarisang. Mangda sekadi Tunini ring Janaloka. Sane siosan banggayang Gek Sri lan Gek Darsini sane ngalaksanayang. Yen mrasa sulit sinah ipun ngorahang ring titiang. Nah, mangkin titiang pamit. Pudak iring Ibu pang melah nah!" ucapanne Gusti Ngurah lantas ka margane sawireh montore sampun teka. Rabinne lan Meina ngecup Ibunne lan Gek Darsini ane magutit ngecup Gung Nantha, mara lantas nutug Gusti Ngurah ka jaba.
"Daaag Gek Darsini." katimbal "Daag sayang Gung Nantha, Bli, Mbok, Meina."
Montore ane muat Gusti Ngurah magerus liwat Klungkung terus ka Padangbai, kenten masih Gek Darsini enggal menek montor ane ngaba ragane nganginang ka Janaloka. Kari ibune lan Ni Pudak bengong nyangongak cara tluktake kuangan yeh, bolak balik saget marep kauh ngetut pamargin putunne, saget marep kangin ngetut pamargin okanne mapag suryane galang kangin, sayan galang, sayan ebek anake di jalan.
"Ngiring Tu Biang, ngiring mantukan, dumadak oka, mantu lan putune selamet ring pamargi," aturne Ni Pudak nandan Gusti Biang Ngurah ane ngepes toyan panonne.
"Nah, jalan menekan kanggoang padidi jumah. Tusing perlu ka alase, jumah masih dadi matapa, nyalanang wana prasta. Gumantine apang bisa ngrasayang di ramene ngrasa sepi, nanging di sepine apang ngrasa rame, ada Hyang Widhi marengin iraga."
314
