manawi nyak sirep," atur mantune. Gusti Biang Ngurah nyangkol putune iyang-iyunganga saha macangkriman matembang pucung. Kasuen-suen Gung Nantha klier-klier lantas sirep di pelukan ninine. Alon-alon ninine nyirepang di kamar lantas kasaputin. Ledang kayunne nyingak putune lelep sirepne. Mara lantas pada ngungsi kamarne suang-suang sawireh sampun jam sia wengi.
Manine jam 3.00 semeng Gek Darsini lan Ibune sampun matangi lantas ka pwaregan ngae yeh anget, anggon ngawedang lan yeh siram rakane. Buin a jebosne Gusti Ngurah lan rabine matangi lantas masiram. Mara lantas okane tangianga lantas ka elapin, kasalinin nganggo baju dingin. Nyambil nuptupang barange Ratna Dumilah ngaenang okane susu, ane lenan sami pada ngawedang ngilangang dingine manulang. Ni Pudak seka besik ngaba koper lan barange ka pamedale, nyaga montore ane luas.
"Ibu, niki sampun nandes jam lima, titiang mapamit. Dumadak Ibu kenak kaonin titiang lunga. Niki wenten bekel akedik anggen numbas napi to sane perlu nadak-nadak," kenten aturne Ratna Dumilah saha ngenjuhin matuane amplop.
"Ngujang dadi cening maang Ibu pipis buin. Jumah suba cukup yen anggon Ibu padidi. Gumantine cening anake di padesanan apang sing kapesan. Apa buin cening enu naggung adi-adine masekolah. Ibu tusing taen maang sangu adine yen mulih. Pamupun carike cukup anggon Ibu mawidesa Ian marerainan," kenten pasaur Ibunne nampenin.
"Inggih Bu, ngapidan sih titiang polih ngaturin Ibu? Dumadak mangda nyidaang titiang nabung anggen mecikang balene raabne sampun sayan tipis. Becikan gentosin antuk genteng tanah. Mangkin meweh numbas genteng tiying," aturne Gusti Ngurah.
"Nah yen keto papineh ceninge Ibu suksma pesan. Urusan
313
