"Inggih yen sapunika Tunini, Aji, Ibu, lan Gek Sri tiang pamit mangkin. Nikain Gek Darsini nyanan mangda mantuk dumun ka Baledan rauhe saking sekolahan," kenten aturne Gusti Ngurah, Ratna Dumilah lan Meina nyalamin anake lingsir ane bengong, bengbeng sedih. katinggalan cucu, lan kompyangne lakar luas joh.
Gusti Ngurah Darsana ngajak rabi, oka, lan Meina pesu ka margane ngalih montor ane lakar ka Baledan. Ajahan montore teka lantas penekina, maseret ngawangang nyelag abian salake nedeng mabuah, nyeririt dimargane apit carik ane misi padi nedeng kuning satmaka emas sinangling pakenyahnyah kasinaran surya ane mara dauh kalih semengan. Teked di jero Meina tuun si malu ngiring Gung Nantha, tututina teken Gusti Ngurah lan rabinne ngaba tas. Gusti Biang Ngurah enggal mapagin nyangkol putunne.
"Kenken kabare Ngurah, Ratna. Apa panikan ninine mara tumben jagjagin. Apa kenak raganne bantek malinggih?" Kenten pitaken Ibunne nakonang bibinne.
"Beh, kenak pisan Bu. Malah ragane sane ngarya canang lan banten yen katuju purnama, tilem, lan Kajeng Kliwon. Di kenkene nyampat di mrajan lan di lojine badangin. Gung Nantha icena pangampin Rp 10.000,00,- Ibunne icena bungkung tetamyangan akatih, pinaka pasaluk teken mantune," pasautne Gusti Ngurah ngalapur ring ibune.
"Nah, patuta tunas paican anak lingsir anggon temon-temon," pitutur Ibune.
"Ibu, titiang mamargi saking deriki benjang semengan pisan mangda polih kapal sane malayar jam 8.00 saking Padangbai. Aji, Ibu sareng Gek Sri sampun majanji jaga matemu ring pelabuban. Sapunapi Ibu durus sareng ka Sasak, gumanti mangda wenten iring tiang ka Sengkol mlaku pelih ring reramanne Ratna Dumilah,"aturne Gusti
310
