"Kenken kaden ramenne yen makejang oka lan putunne rauh pada tangkil uli Sasak lan uli Baledan ngaturang bakti di katuju piodalan di mrajan."
Sorene nika anake lingsir macarita teken putu-putunne indik dugase enteg Baline, pailehan zaman Belandane ngalahang Buleleng, Badung, Klungkung, zaman Jepang, zaman revolusi dugas pamudane kayang Gusti Ngurah Bagus ngalas lan Ibunne luas ka Tanjung ngalahin Gusti Ngurah Darsana kari alit, mawanan anake lingsir tuara milu ka Sasak saking madalem putune. Gusti Ngurah, Gek Sri, lan Gek Darsini padelengdeng yeh panonne mirengang. Nanging Ibunne sedih mrasa jengah, satmaka kalalungin ben ninine. Ngenggalang ragane ngaenang yeh anget anggen nyiramin putunne, apang anake lingsir usan macarita. Gusti Ngurah nulungin ajine nyelepang pakan siape ka gudang ukuran aminggu sawireh lakar kaonina ka Sasak, apang wang jerone ten repot meli pakan siap.
Maninne semengan sesampune pada masiram lan nyampah, Gusti Ngurah mataki-taki lakar mapamit. Ibune sampun nyediaang banten apang oka lan mantunne maan mabakti di mrajan sapisanan mintonang putunne sawireh lakar luas ka Rababima. Makejang ka puputang antuk nininne ane mula dados pamangku di mrajan.
"Ibu, Aji lan Tunini, titiang sampun usan muspa ring mrajan. Mangkin pacang mapamit, mangda polih madabdaban ngringkes barang-barange sane jaga bakta ka Sasak benjang. Ngiring usahayang mangda jam 8.00 sampun matemu ring Padangbai."
"Nah, Ibu ajak aji lan adine uli dini lakar pasemengin apang maan ngalantas meli karcis kapal. Keto masih anggon sangu di kapal depang Ibu ane nyediaang apang cening tusing repot lan masepan-sepan lakar majalan semengan," pandikan Ibunne negesang.
309
