bani nombaang, apang misi amun kayunne. Idep-idepang olah raga," pasaut matuanne.
"Mula keto ning pailehan uripe. Uli mara lekad iraga patut magae ngawit ane ingan, sayan berat nganti ane paling berat. Lantas buin nginganang nganti ane paling ingan, mara lantas ngoyong saking sing ngelah bayu, sabda lan idep lantas kadanin mati. Atmane mulih maring paramatma lan awake mulih maring panca maha buta. Yen ada anak enu idup sing nyak magae sujatinne ia suba mati saenune hidup," kenten ninine Gusti Ngurah lantas mapamit lakar nulungin ajinne nabdabang barange ane lakar maba ka Sasak. Gusti Biang Suci ka pwaregan nulungin Meina mragatang masakane ane kari ngae jukut dogen. Gek Sri lantas ngajak Gung Nantha maplalian di pinggir kolame batan jrotine sambilanga ngetis. Gusti Ayu Darsini saget teka masepedaan ngaba bungkusan.
"Niki Bu, tiang numbas saduran wau di kantin," atutne nyerahang bungkusane.
"Nah, sedeng melaha anggon darang nasi jani Gek Darsini," pasaur Ibunne saha masoda di meja makan. Meina nyacarang piring, gelas, lan yeh inum mawadah morong. Ratna Dumilah nyemak okanne ane lelep di pangkuanne Gek Sri lantas sirepanga di kamar. Salanturne makejang lantas ngajengang ngiter meja di kamar makan.
"Beh, tumben naar saduran Karangasem. Ibi di Klungkung meli sromotan, yen teked di Sasak miribne paling malu lakar meli plicing kangkung ane misi cuka Gek Sri?"
Makremosan pada ngajengang ngiring aji kayang ninine ayahina teken Meina, Gusti Biang Suci busan-busan ngimbuhin nasi, darang nasi mabe siap, taluh, karper, lan pindang cekalan. Ninine ledang pesan kayunne nyingak putunne pada magegonjakan. Di papinehne marawat
308
