ja nini dogen dadi kakutangan jumah. Makejang ngalahin ngungsi ka Sasak. Paling-paling Ibun ceninge di Baledan kapah-kapah nelokin mai katuju ada rainan utawi usaba di Baledan," pandikanne Gusti Biang Putu lingsir lantas nyolekin Gung Nantha basma saha ngicen pangampin Rp 10.000,00 Salanturne ragane ngagah bungselan lantas ngicen Ratna Dumilah bungkung tetamiangan akatih. Matuanne ngawangsitin apang nerima paicanne.
"Inggih Tuniang, matur suksma. Ampurayang titiang wau polih matur. Semalihe nenten nyidaang ngaturin napi, kanggeang puniki samatra anggen temon-temon," aturne Ratna Dumilah saha ngaturin bungkusan. Gusti Ngurah masih ngelut nininne kasihasih.
"Apa tenenan ning?" Lantas gagaha bungkusana "Miih kain tatununan dija ning, babikasanne cara gringsing Tenganan. Yen kakene patut anggon nini rurub di matine"
"Beh ngudiang dados nini ngandika kenten? Dumadak ja mangda nini panjang yusa nyingak kompyange. Niki kain pakaryan Timor genah titiange makarya."
"Nah, nini suba tua. Suba patuta mulih ka karange wayah. Nanging nini lega sawireh jani ada panak, cucu, kompyang ane nyak mulih ngingetin tanah plekadane, nyambungang jerone di Janaloka teken di Baledan," kenten pitutur nininne sendu.
Sedih Ratna Dumilah mirengang, nanging masih angob teken anake lingsir kari cedang nyingakin matetoesan ngae canang anggen purnama, tilem, lan Kajeng Kliwon.
"Ibu, angob titiang ring katrampilan wiadin cacepne Tuniang ngarya canang?"
"Anak mula keto pakaryanne dadi tukang banten uli ilu. ibu sing
307
