Biasanne encebanga apang emes."
"Nggih Bu, tiang pamit dumun," kenten aturne Gusti Ngurah ajak rabinne lantas pesu karurunge tutuga teken Meina lan Gek Sri nyingal Gung Nantha. Jam kutus raganne sampun menek montor lakar ka Janaloka. Gusti Biang Ngurah ulap-ulap teken putunne. Di jalan tuara med-med Meina nakonang adan desa lan woh-wohane magenepan di sisin margane luire duren, salak, wani, manggis, biu gadang, lan kuning muah ane lenlenan. Tan caritanan di jalan saget sampun teked di Janaloka. Gusti Ngurah Gede lan rabinne ledang pesan kayunne mara nyingak okanne, mantune lan putunne rauh.
"Nah mai ja Ratna menekan. Tumben jani mara taen mulih mai nelokin umahe ane magrudugan sing ada ane ngarawat. Sasukat ibune mulih mai mara madeng-adengan buin majumu kabenahin. Tingalin ento ninine malinggih di lojine badangin," pandikan ibunne matujuhin Gusti Ngurah lan mantunne ane tumben nelokin nininne.
"Beh, wiakti. Yen kenten Gung Nantha patut nunas basma apang ten kumpinan, sawireh tumben matemu sareng kompiangne," kenten aturne Gusti Ngurah lantas ngajak rabinne. Gusti Biang Suci nyingal putunne ka loji matur teken Ibunne Gusti Biang Putu.
"Ibu, niki putune Ngurah Darsana ajak mantune Ratna Dumilah lan kompiange Gung Nantha rauh jaga nginep deriki. Mangkin icenin pangampin, basmain dumun mungpung Ibu kari nyedah," aturne Gusti Biang Suci ring Ibunne ane malinggih di loji.
"Mimiih saja, pelanan Ngurah nganten turmaning jani suba ngelah anak cerik pinaka kompyang, nini tusing taen mulih ka Baledan. Kenkenang nini suba tua sing bani mamontoran. Mai ja dini negak Ratna, kanggoang umahe uwug kakene. Jani sasukat Gek Sri masekolah di Badung mara Ibu lan Ajine nyak mulih. Yen ipidan pragat
306
